Si Jamaa Leydi Bulɗii Ɓe wontay Maccuɓe

Gila bimmbi, ko gori-gocci buy e werlaaje laamuyankooje woni ko ɓorii Konaakiri faade Maamun. Sabu honnɗum ?

Sabu mooɓondiral, Gimi e gami, coowodugol e maale... Teentinii sarkugol jawle leydi ndin ko aldaa e hersa hara ɗum kadi ko e innde dawro, ngo jamaa finuɗo yiɗataa sakko faalee.

Hay laamateeri kiɗɗi koministji waynondiriino e ɗum sabu fuutugol ɗen kuuɗe. Kono ka men ɗoo, ɗum seeraali haajooni hino jaali, a wi'ayma nden ŋooroŋaaraare wontiino maande peewal ngenndiyankowal.

Fewndo on tuma, ka nder-ndeeri koɗooli tosooki, fayɓe hino seppa kiloomeeterji fii yahugol ekkol ko aldaa e julle, rewɓe hino jibina e tumbo labutaaneeji ɗi alaa ilam-yiite, hara ɓeynguureeji yelen hino yara ndiyam ɗam tagaaɗo haana meeɗude.

Kono, ella on hino ɓuri ɗum luggude. Ko ɓay ko jamaa men on wonaa e bulɗinireede dow ɗowol. Sabu non jamaa bulɗuɗo ko jamaa yeebiiɗo. Ɗum-le wonaa nii tun: tuma nde laamu faalaa irude peɗa ngu moƴƴinta ko tampere, jilkita jannde nden, ngu dolna keɓal hoyngal. Ngu waɗtitira miijo-jeertino dewal, yaakaare nden jebbilaare.

Fewndo ka woɓɓe kellata ɗon sikkugol ɓe ko weltoragol mawngu yeesoojo, hiɓe cidude e koheran maɓɓe dow ɓe annda.

Ndii leydi no foddi e ko ɓuri ɗum, hindi foddi e goonga, needi, ndimu, teentinii wontugol e laawol.

MO DAAWUUDA